MASAUNI AWATAKA KUHAMA WANAOISHI MAENEO HATARISHI MTO MSIMBAZI |Shamteeblog.

NA; MWANDISHI WETU, DAR ES SALAAM

Waziri wa Nchi, Ofisi ya Makamu wa Rais (Muungano na Mazingira), Mhe. Mhandisi Hamad Yussuf Masauni amewataka wananchi wanaoishi maeneo hatarishi hasa pembezoni mwa Mto Msimbazi kuhama kwa kuwa wanahatarisha usalama wa maisha yao na mali.

Waziri Masauni amesema ni bora kwa sasa wakatafuta makazi mbadala kwa kuwa mazingira wanayoishi sio salama kwao pamoja na familia zao hasa kutokana na utabiri uliotolewa kwa uwepo wa El Nino.

Mhe. Masauni ameyasema hayo wakati wa ziara yake ya kikazi Jijini Dar es Salaam, Septemba 3, 2026, kutekeleza maelekezo ya Makamu wa Rais wa Jamhuri ya Muungano wa Tanzania, Mhe. Deogratius Ndejembi aliyoyatoa wakati wa ziara yake Septemba 18, 2026.

“Kwa kweli Maisha yao yapo hatarini, niendelee kutoa wito kwa wananchi wote ambao wanaishi katika maeneo kama haya, sio kwa Dar es Salaam pekee bali nchi nzima wanapaswa kuchukua tahadhari juu ya hii.

“Nipende kusisitiza kwa watu wote kusikiliza maelekezo ya wataalamu hasa katika kipindi hiki juu ya utaratibu wa kuishi katika maeneo haya au ikiwezekana kuhama na kutafuta makazi mengine,” amesema Masauni.

Aidha, Waziri Masauni amesema kuwa licha ya jitihada kubwa zinazofanywa na Serikali kukabiliana na changamoto ya taka na uchafu katika mifereji na mito, baadhi ya wananchi bado wanaendelea kutupa taka katika maeneo hayo.

Ameongeza kwa kuwataka viongozi katika ngazi zote kusimamia kikamilifu utekelezaji wa maelekezo ya Rais wa Jamhuri ya Muungano wa Tanzania Mhe. Dkt. Samia Suluhu Hassan, akisisitiza kila mmoja anapaswa kuwajibika ili kuhakikisha maelekezo yanatekelezeka kwa kuhakikisha miji inakuwa misafi.

Kwa upande wake, Mkuu wa Wilaya ya Ilala, Edward Mpogolo, amesema Serikali itaendelea kushirikiana na wananchi kuhakikisha mifereji na njia za maji zinakuwa safi na zinaweza kupitisha maji kwa ufanisi wakati wa mvua.

Ameongeza kuwa Halmashauri itaendelea kushirikisha sekta binafsi katika huduma za usafi, huku Dampo la Pugu Kinyamwezi likipokea excavator mpya ili kuongeza ufanisi wa usimamizi wa taka.